Stor verdiskaping i den lokale fiskeflåten
Om ein ser på Fiskeridirektoratet si oversikt så er det 25 registrerte fiskebåtar i Florø og på øyane rundt. Då reknar ein med alt frå ein-manns sjarkar på 6-7 meter til ringnotbåten Fiskebas, som er den største på 64 meter, og som er innreidd for 14 personar. For kvar 10. fiskar i Kinn blir det generert 4,3 årsverk på land.
Fiskeflåten i Florø skapar mange arbeidsplassar, store verdiar og store økonomiske ringverknader langt innover land. På landsbasis er totalt 17 000 personar sysselsette i aktivitetar knytt til fiskeflåten. 11 000 av desse jobbar direkte med fiskeri, medan dei resterande 6 000 er sysselsette gjennom ringverknader. Det betyr at ringverknadane utgjer 35 % av totalen. I Kinn kommune er det totalt 265 personar som er sysselsette i tilknyting til fiskeflåten, av desse er det 185 som reiser ut på sjøen og 80 personar (30 %) som er sysselsett gjennom ringverknader, i følge Nofima sin publikasjon.
Bærebjelken på kysten
I Kinn kommune var verdiskapinga frå fiskeflåten på 350 millionar kroner i 2023, medan Vestland fylke kan vise til 3,8 milliardar, der 2,9 er kjerneverksemd og 850 mill. kjem frå ringverknad. Rapporten frå Nofima viser at fiskeri er ein bærebjelke langs kysten. Fiskarane skapar store verdiar og ikkje minst mange arbeidsplassar i ulike næringar. Det som går direkte til fiskeflåten, er arbeidsgodtgjersle til fiskarane, overskot til kapitaleigarane og elles ulike avgifter. I tillegg blir det betalt skatt av løn og overskot til eigarane.
Jobbar du for fiskeflåten?
Det som går ut av båten og skapar eksterne arbeidsplassar er mellom anna mottak og bearbeiding av fisken, drivstoff, vedlikehald, kjøp/ nedskriving av fartøy, fiskereiskap, agn, is og emballasje, forsikring, proviant, lossing og lagring, IT og kommunikasjon, hamnekostnad, NOx–fond, kontigent, rekvisita og utstyr, reise, rekneskap, revisjon og juridisk bistand, teknisk analyse og skipskonsulent. Rekka er lang og mange i Florø kan nok sjå at fiskeflåten er med og betalar deira løn.
All fisk blir selt på auksjon og bearbeidda i Norge – frå Måløy til Tromsø. Hovudtyngda av fangstane til garnbåtane i Florø blir lossa som frossen fisk på Måløyterminalen. Anlegget har kapasitet på ca 3.500 tonn frossen fisk.
Nye generasjonar går om bord
Dei fleste fiskebåtane i Florø har base i byeneller på øyane dei har tilknyting til, men det er trongt om plassen i kystbyen. Fanøyvåg har valt å ha basen sin i Måløy, av praktiske årsaker, fortel Geir Henning Seljeseth. Vi manglar eigentleg ein møteplass i Florø, seier han. Sjølv om vi ikkje får møtast fysisk så har vi bra kontakt, og samarbeider når det er nødvendig. Alle er medlem av Fjordane Fiskarlag, som er eit av dei største laga i Norge.
Lærlingane i kø
Dei fire fiskebåtane Skjongholm, Fanøyvåg, Fiskebas og Breivik Jr. er typisk nok familiebedrifter, og alle har klart å få nye generasjonar med om bord. Ein annan viktig faktor for oss er at vi har Måløy vgs., det er viktig for rekrutteringa. Lærlingane står eigentleg i kø for å komme seg på sjøen.
Kjenner du ein ungdom som har lyst til å prøve seg som fiskar? Les meir om Kinn kommune sitt ungdomsfiskeprosjekt på side 9.
Berekraftig utnytting
Sjølv om kvotane går ned så har prisane gått opp slik at vi balanserer bra, seier Geir Henning. Dessutan er vi gode til å utnytte dei moglegheitene vi har, som til dømes å fiske etter lange og lysing som ikkje er kvoteregulert. For tida er rogn og lever veldig i skotet, og då tek vi sjølvsagt vare på den, sjølv om det er arbeidskrevjande. Det er berekraftig å ta vare på heile fangsten. Desse «biprodukta» vert sende nordover, blir selde på auksjon og går til tran og kaviarproduksjon.
Kjelder:
Fiskedirektoratet
Nofima: Flåtens ringvirkninger | Verdiskaping og ringvirkninger fra den norske fiskeflåten i 2023.
