Kinn kommune er klar for ny sesong med ungdomsfiske

Er du mellom 15 og 25 år og nysgjerrig på fiskaryrket? Då kan du søkje sommarjobb i Kinn kommune sitt ungdomsfiskeprosjekt! Prosjektet vart gjennomført for første gong i 2024 for å sikre rekruttering til yrket og bidra til å skape interesse for dei marine og maritime linjene ved Måløy vgs. Prosjektet vart organisert av Kinn kommune og Måløy Vekst, i samarbeid med lokale aktørar og med støtte frå Nærings–og fiskeridepartementet og lokalt næringsliv.

12 ungdommar fekk ei veke på sjøen, fordelt på to fartøy i Måløy og Florø. Dei fekk opplæring i fiskerifaget og lærte meir om råstoff, lottkalkulasjon og innmelding av fangst. Ungdommane fekk òg delta på eigen sikkerheitsdag og sit igjen med verdifull erfaring i praktisk fiske og sjømannskap, men òg arbeidserfaring, nye vener og nettverk i fiskerinæringa.

Ingen sommarjobb utan løn – ungdomane fekk løn tilsvarande sal av fisken dei fanga sjølve.

No har kommunen akkurat ferdigstilt søknaden for ei ny runde med ungdomsfiskarar i 2025, så dersom dette er noko for deg – ta kontakt med Kristin Maurstad på e-post til: kristin.maurstad@kinn.kommune.no