Foto: Visit Fjordkysten og Sunnfjord
Framtida ligg i havet
Reis til Kinn og bli rik sa dei for 150 år sidan, og det ordtaket gjeld enno. Det er her i havgapet at ressursane og moglegheitene ligg. Både fiskeflåten og havbruksnæringa består av hardtarbeidande folk, som tilfører oss noko så viktig som mat. I tillegg har havnæringane store ringverknader, langt inne på land.
For folk som lever og bur i Florø, er havet framleis den viktigaste kjelda til verdiskaping og mat på bordet. Medlemsbedriftene i FIN femner om alt frå forsyningsbase til elektrikarfirma, entreprenørar og fiskeeksportørar – og ja, alle har ein eller annan link til havet. Anten du produserer fiskefôr i Gunhildvågen eller er resepsjonist på eit av byens hotell, så veit du at jobben din er basert på ressursar frå havet.
Berekraftig næringsliv
Næringslivet og folk flest har eit sterkt fokus på det grøne skiftet, og ikkje minst grøn energi. Dei havbaserte næringane viser veg i dette arbeidet. Bedriftene i Florø tar grep og er langt framme i skoa når det gjeld å drive berekraftig. Flora Industri–og Næringsforening er ein viktig møteplass for utveksling av erfaringar og idear – og får bedriftene til å jobbe saman mot felles mål.
Vi treng folk
Rekruttering er eit varmt tema, som engasjerer FIN medlemmane. Arbeidsplassar er det viktigaste kriteriet som må vere på plass for at folk vil flytte til den vakre kystbyen. Industrien i Florø går så det susar, men vi har ei felles utfordring med å rekruttere folk. FIN jobbar med rekruttering til utdanningane vi tilbyr i Florø, å rekruttere lærlingar og vise fram kompetansearbeidsplassane som finnast her. Det havbaserte næringslivet i byen har mange ulike og spennande jobbar å tilby.
Havnæringane har store ringverknadar, langt inne på land.
Mot utanforskap
Samtidig vil vi slå eit slag for arbeidet mot utanforskap. Det sit mange unge «heime på guterommet», med ulike utfordringar, som kunne gjort ein innsats med litt startstøtte. FIN har tett dialog med NAV, og oppfordrar medlemsbedriftene til å tenke litt annleis, og gje dei som fell utanfor ein ny sjanse. Medlemsbedrifta Origod er 50 år i år, og kan vise til mange suksesshistorier rundt om i bedriftene. Det er plass til fleire.
Framtida i havgapet
For FIN er det viktig å framleis vende blikket mot havgapet, der moglegheitene ligg, og saman løyse framtidas utfordringar. For bedriftene i Florø er det tilgang på grøn kraft, arbeidskraft og god samferdsel som står i fokus.
Tor Førde
styreleiar i Flora Industri- og Næringsforening
